میدان وردګ کې محتسبینو یوه مېرمن له دوولس کلن کورني ظلم څخه وژغورله
د میدان وردګ ولایت د امر بالمعروف، نهی عن المنکر او شکایتونو اورېدلو ریاست مسؤلینو په جلګه ولسوالۍ کې یوه مېرمن، چې له تېرو دوولسو کلونو راهیسې د خپل خاوند له لوري له خپل کور څخه شړل شوې وه او د پلار په کور کې اوسېدله او له ټولو شرعي حقونو څخه بې برخې وه د محتسبینو په هڅو وژغورل شوه.
د یاد ولایت د امر بالمعروف مسؤلین وایی: یاده مېرمن چې له تېرو دوو لسو کلونو راهیسې یې خاوند له کور څخه شړلې وه او د خپل پلار په کور کې اوسېدله د محتسبینو په هڅو بېرته له خپل خاوند سره یو ځای او له خپلو شرعي حقونو څخه برخمنه شوه.
دغه راز د امر بالمعروف، نهی عن المنکر او شکایتونو اورېدلو وزارت مسؤلین ډاډ څرګندوي، چې د مېرمنو د شرعي حقونو ورکړې ته ژمن دي او هېڅ چاته به اجازه ور نه کړي چې د مېرمنو حقوق د ناوړه دودونو او غیر شرعي کړنو پر اساس تر پښو لاندې کړي.
د یادولو وړ ده، چې د امر بالمعروف، نهی عن المنکر او شکایتونو اورېدلو وزارت مسؤلینو په ټول هېواد کې د مېرمنو پر وړاندې د تاوتریخوالي ډکو پېښو مخه نیولې او پر مېرمنو د ناوړه دودیزو دودونو کچه یې د پخوا په پرتله را کمه کړې ده، چې پر اساس یې مېرمنې کولی شي په ازاد ډول د خپلو شرعي حقونو غوښتنه وکړي.
