غزني کې محتسبینو پر (۱۱۹) متر مربع ځمکه کرل شوي نشه یي توکي له منځه یووړل
د غزني ولایت د امربالمعروف، نهی عن المنکر او شکایتونو اورېدلو ریاست مسؤلینو د دې ولایت د نشه یي توکو پر وړاندې د مبارزې ریاست د مسؤلینو په همکارۍ، د قانون د ۲۲ مې مادې، ۱۱ مې فقرې او د اميرالمؤمنين حفظه الله د ۱۳ مې ګڼې فرمان مطابق د دې ولایت په اندړو ولسوالۍ کې پر څه باندې ۱۱۹متر مربع ځمکه باندې کرل شوي نشه یي توکي (چرس) له منځه وړي دي.
په دې تړاو د یاد ولایت محتسبین وایي: د نشه یي توکو پر وړاندې د مبارزې ریاست د مسؤلینو په همکارۍ یې د اندړو ولسوالۍ په خړ کلي کې پر (۱۱۹)متر مربع ځمکه کرل شوي چرس یا نشه یي توکي له منځه وړي او د دې لوی منکر مخه یې نیولې ده.
دغه راز محتسبینو کروندګرو ته د شريعت له اړخه د چرسو د حرمت او د نشه يي توکو د کارونې بدو پایلو او ټولنیزو زیانونو په تړاو خبرې کړې او له هغوی یې غوښتي چې په راتلونکي کې د داسې ناوړه کړنو له تر سره کولو ډډه وکړي.
بلخوا ځایي اوسېدونکي د محتسبینو دا کړنه ستایي او له هغوی غواړي، چې د نشه یي توکو د مخنیوي په برخه کې لا هم چټک ګامونه واخلي، چې تر څو پوري ځوانان د دې ناوړه عمل له کولو ډډه وکړي.
دا په داسې حال کې ده، چې د دې وزارت مسؤلینو تر دې ولاندې هم د هېواد په ځینو ولایتونو کې د نشه یي توکو د کرکېلې او کارونې مخه نیولې او ډاډ څرګندوي، چې هېڅ چا ته به اجازه ور نه کړل شي چې د یادو توکو په کښت، خرڅلاو او قاچاق لاس پورې کړي.
