خوست کې د امر بالمعروف قوانینو د تطبیق او په ټولنه کې د ناوړه دودونو د مخنیوي په موخه ناسته وشوه
د خوست ولایت د امربالمعروف، نهی عن المنکر او شکایتونو اورېدلو ریاست مسؤلینو د دې ولایت د والي مولوي عبدالقیوم روحاني په مشرۍ او د ټولو نظامی او ملکي ادارو په ګډون د خوست ولایت مقام کې د امر بالمعروف وزارت د نوي قانون د لا ښه تنفیذ او په ټولنه کې د ناوړه دودونو د مخنیوي په موخه ناسته وشوه.
د ناستې د پیل په خبرو کې د دې ولایت والي مولوي عبدالقیوم روحاني د اسلامي نظام د قوانینو پر تطبیق، تنفیذ او اغېزمنتیا هر اړخیزې خبرې وکړې او زیاته یې کړه، چې د اسلامي نظام د رامنځته کېدو او حاکمیت لپاره ملت لویې قربانۍ ورکړې دي لازمه ده، چې د همدې قربانیو او ارزښتونو د ساتنې لپاره د اسلامي شریعت قوانین په پوره اخلاص او ریښتینې معنی پلي شي.
دغه راز د ناستې ګډون والو په ټولنه کې د ناوړه دودونو د له منځه وړلو او د عامه ذهنیت د سمون پر لارو چارو خبرې وکړې او په دې برخه کې یې خپل نظریات، وړاندیزونه او د همغږۍ طرحې وړاندې کړلې.
ګډونوالو ژمنه وکړه، چې د اسلامي شریعت د حکمونو د پلي کېدو، د ټولنې د اصلاح او د شرعي قوانینو د مؤثر تطبیق په موخه به ګډو هڅو ته دوام ورکوي.
