محتسبین: خپل منځي شخړې ټولنه د بې اتفاقۍ لور ته ټېل وهي
د میدان وردګ ولایت اړوند د دایمیرداد او جلګې ولسوالیو محتسبینو په ګډه همکارۍ د پنځو کورنیو تر منځ د حقوقي مسائلو پر راپورته شوې اته کلنه بدي حل او پر دوستۍ بدله کړه.
په دې اړه جوړه شوې ناسته کې، محتسبینو د سولې پر ارزښت خبرې وکړې او ویې ویل: خپلمنځي شخړې ټولنه د بې اتفاقۍ لور ته ټېل وهي، د خلکو ژوند له ګواښ سره مخ کوي او په ټولنه کې د نورو ستونزو د را منځته کېدو سبب کېږي.
محتسبیو د سیمې پر خلکو غږ وکړ، چې د اسلامي اصولو په رڼا کې ژوند وکړي او په ټولنه کې شته ستونزې د الهي قوانینو او جرګو له لارې حل کړي.
محتسبینو همدا راز زیاته کړه ، د اسلامي امارت د هرې برخې مسؤلین هڅه کوي تر څو د هېواد والو له پاره د ارام ژوند تېرولو زمینه برابره کړي او چاته دا اجازه نه ورکوي چې ګډوډیو او بې اتفاقیو ته لار هواره کړي.
بلخوا ځایي اوسېدونکي په ټولنه کې د محتسبینو کړنې ستایي او له امارتي مسؤلینو او قومي مخورو غواړي چې د خلکو ترمنځ د شته ستونزو د هواري لپاره خپلې هڅې جاري وساتي.
دا په داسې حال کې ده، چې تر دې وړاندې هم د د ې ولایت محتسبینو د ورته لسګونو بدبو مخه نیولې او خلک یې د یووالي لور ته رابللي دي.
