میدان ورګ ولایت کې د شپږ کلن کورني تاوتریخوالي قرباني شوې مېرمن د محتسبینو له لوري وژغورل شوه
د میدان وردګ ولایت محتسبینو د مېرمنو حقونو ته په ژمنتیا او په ټولنه کې د عدالت د را منځته کولو په موخه یوه مېرمن چې د خپل خاوند له لوري له تېرو شپږو کلونو راهیسې له ظلم او کورني تاوتریخوالي سره مخ وه وژغورله.
محتسبین وایي: یاده مېرمن چې د میدان وردګ ولایت د سید اباد ولسوالۍ اوسېدونکې ده، له تېرو شپږو کلونو راهیسې له جدي کورني تاوتریخوالي سره مخ او له ټولو شرعي حقونو څخه بې برخې وه؛ د محتسبینو له لوري وژغورل شوه او له خاوند څخه یې ژمنه واخیستل شوه چې په راتلونکي کې د داسې ناوړه کړنو له تر سره کولو ډډه وکړي.
محتسبین زیاتوي، هیڅ چاته به اجازه ور نکړي چې د مېرمنو پر وړاندې له تاوتریخوالي ډک چلند څخه کار واخلي او په پوره توان سره به د هغو ټولو ناوړه کړنو مخه ونیسي چې د مېرمنو حقوق له ګواښ سره مخ کوي.
بلخوا ځایي اوسېدونکي په ټولنه کې د عامه ذهنیت د سمون، معروفاتو اقامې، منکراتو مخنیوي او په ځانګړي ډول د مېرمنو د حقونو ورکړې برخه کې د محتسبینو کړنې ستایي او د مېرمنو د حقونو د تأمین غوره لار یې بولي.
