د بلخ ولایت محتسبینو تاریخ تېره درمل ضبط او له منځه یوړل
د بلخ ولایت د امر بالمعروف نهې عن المنکر او شکایتونو اورېدلو ریاست محتسبینو د خپلو فعالیتونو په لړ کې د ښار له یو شمېر درملتونو څخه تاریخ تېره درمل ضبط کړل.
محتسبین وایي چې یاده کړنه یې د ولایت د صحي برخي له مسؤلینو سره په همغږۍ ترسره کړې چې په نتیجه کې یې په زیاته اندازه تاریخ تېره درمل ضبط او له منځه یوړل.
محتسبین زیاتوي چې د یادو درملتونونو له مالکینو یې ضمانت واخیست چې بیا به تاریخ تېره درمل نه پلوري او که چېرته دا کړنه بیا تکرار شي، عاملین به یې قضایي ارګانونو ته سپارل کېږي .
دا په داسې حال کې ده چې تر دې مخکې هم محتسبینو په یو شمېر ولایتونو کې تاریخ تېره درمل ضبط او له منځه وړي.
امر بالمعروف، نهې عن المنکر او شکایتونو اورېدلو وزارت هېواد والو ته ډاډ ورکوي چې هېچا ته به اجازه ور نه کړي چې د هېواد والو له ژوند سره لوبي وکړي او د قانون او شریعت خلاف کړنې ترسره کړي.
