محتسبینو په لوګر، میدان وردګ، غزني او ننګرهار ولایتونو کې (۹) مېرمنې له کورني تاوتریخوالي وژغورلې.
د امربالمعروف، نهې عن المنکر او شکایتونو اورېدلو وزارت اړوند د غزني، میدان وردګ، ننګرهار او لوګر ولایتونو محتسبینو نهه مېرمنې، چې له خپلو ټولو شرعي حقونو څخه بې برخې او له جدي کورني تاوتریخوالي سره مخ وې وژغورلې او د یادو مېرمنو د کورنیو له غړو یې وغوښتل چې په راتلونکي کې د داسې او ورته ناوړه کړنو له تر سره کولو ډډه وکړي.
د یادو ولایتونو د محتسبینو په وینا: یادې مېرمنې چې له اوږدې مودې راهیسې د بې معنی غیرتونو او ناوړه دودنو پر اساس زورول کېدلې او له جدي کورني تاوتریخوالي سره مخ وې د محتسبینو له لوري وژغورل شوې او له خپلو شرعي حقونو څخه برخمنې شوې.
د امربالمعروف، نهې عن المنکر او شکایتونو اورېدلو وزارت محتسبین ډاډ څرګندوي چې په پوره توان به د مېرمنو له شرعي حقونو څخه دفاع کوي او د هغو ناسمو روایتونو مخه به نیسي چې د مېرمنو شرعي حقوق له ګواښ سره مخ کوي.
د یادولو وړ ده، چې د دې وزارت محتسبینو د مېرمنو د نورو حقونو لکه میراث، مهر او خپلې خوښې نکاح تر څنګ لسګونه مېرمنې له کورني تاوتریخوالي او کورنیو بندخونو څخه ژغورلې دي.
