د امربالمعروف، نهې عن المنکر او شکایتونو اورېدلو وزارت اړوند د خوست ولایت محتسبینو د سیمې د دیني عالمانو او قومي مخورو په منځګړیتوب د دوو قومونو تر منځ (۱۹) کلن خپلمنځي اختلافات چې د ګڼ شمېر ستونزو، ناخوالو او د دواړو قومنو ترمنځ د اړیکو پرې کېدو لامل شوي وه حل او شته د ښمنۍ یې پر دوستۍ بدلې کړې.

په دې پار جوړې شوې ولسي ناستې ته محتسبینو په خبرو کې وویل: الله جل جلاله موږ ته په قران کریم کې ویلي چې مؤمنان د یو وجود حیثیت لري چې دوی باید پخپلو منځونو کې یو بل له بدیو منع کړي او د نېکیو لور ته یې را وبولي چې همدا د اسلام د مقدس دین غوښتنه ده. د هغوی په وینا (خپل منځي شخړې ټولنه د بې اتفاقۍ لور ته ټېل وهي او د خلکو ژوند له ګواښ سره مخ کوي او په ټولنه کې د نورو ستونزو د را منځته کېدو سبب کېږي).

محتسبینو دغه راز د سیمې پر خلکو غږ وکړ چې د اسلامي اصولو په رڼا کې ژوند وکړي او په ټولنه کې دې ټولې ستونزې د خبرو او جرګو له لارې حل کړي.

 ورته مهال ځایي اوسېدونکو د امر بالمعروف وزارت د محتسبینو اصلاحي  کړنې وستایلې او زیاته یې کړه چې مسؤلین، قومي مخور او متنفذین  باید د خلکو ترمنځ د شته ستونزو د‌ هواري لپاره خپلې هڅې جاري وساتي.