هلمند کې یوه مظلومه مېرمن او درې یتیمان له تاوتریخوالي وژغورل شول
د هلمند ولایت د امر بالمعروف، نهې عن المنکر او شکایتونو اورېدلو ریاست محتسبین وایي: یوه مظلومه مېرمن چې له اوږدې مودې راهیسې د خپل خاوند له لوري له فزیکي، رواني او روحي تاوتریخوالي سره مخ وه او پر بدن یې د زورونې آثار څرګند وو، ژغورلې ده.
د محتسبینو په وینا د یادې مېرمنې خاوند ته یې د مېرمنو شرعي حقونه بیان کړي او ژمنه یې ترې اخیستې چې له خپلې کورنۍ سره به په شفقت، عدالت او درناوي چلند کوي.
بلخوا د یاد ریاست محتسبینو درې یتیم ماشومان چې د خپلې میرې له لوري په فزیکي او رواني ډول زورول کېدل او حتی د ماشومانو نوکان وېستل شوي وو، وژغورل شول او د ماشومانو میرې ته د یتیم پالنې د فضیلتونو او د ظلم پایلو په اړه د معلوماتو ورکولو ترڅنګ ترې ژمنه واخیستل شوه، چې له دې وروسته له ظلم او زیاتي لاس واخلي.
دا په داسې حال کې ده چې د محتسبینو ورته کړنې د ولسونو له پراخ هرکلي سره مخ شوي دي.
