لوګر کې (۱۰) کلنه دښمني چې د قتل لامل شوې وه د محتسبینو له لوري حل شوه
د لوګر ولایت محتسبینو د ټولنیز عدالت د تأمین، قومي او ژبني تعصباتو د مخنیوي په موخه د قومي مخورو او دیني عالمانو په منځګړیتوب د د ې ولایت په خوښۍ ولسوالۍ کې (۱۰) کلنه دښمني حل او پر دوستۍ بدله کړه.
په تړاو یې د دې ولایت د امر بالمعروف رئیس مولوي عبدالحکیم حقاني وویل: یاده دښمني، چې له تېرو لسو کلونو راهیسې روانه وه، چې د یوې مېرمنې پر قتل سر بېره د شخړو او ګڼو نورو ستونزو لامل شوې وه د لوګر ولایت د محتسبینو په هڅو او د سمیې د دیني عالمانو او قومي مخورو په منځکړیتوب حل او پر دوستۍ بدله شوه.
بلخوا په دښمنۍ کې ښکېلو اړخونو د دې دښمنۍ پر حل خوښي وښوده او ژمنه یې وکړه چې له دې وروسته به پخپلو کې د وروڼو په څېر ژوند تېروي.
د یادلو وړ ده، چې د امر بالمعروف، نهی عن المنکر او شکایتونو اورېدلو وزارت محتسبینو تر دې وړاندې هم د هېواد په کچه د سلګونو دښمنیو مخه نیولې او په دې پار یې کړنې لا هم دوام لري.
