زابل کې یوه مېرمن (۶) کلن ماشوم ته په جبري توګه له نکاح کولو څخه وژغورل شوه
د امربالمعروف، نهې عن المنکر او شکایتونو اورېدلو وزارت اړوند د زابل ولایت د امربالمعروف محتسبینو یوه مېرمن چې د خسرګنۍ د غړو له لوري، یوه شپږ کلن ماشوم ته په جبري توګه په نکاح ورکول کېده وژغورله.
په دې تړاو د یاد ولایت د امربالمعروف ریاست رئیس مولوي محمد ابراهیم جاوید وویل، یاده مېرمن چې خاوند یې وفات شوی و او د مړه شوي کس قریبانو غوښتل چې یاده مېرمن یوه شپږ کلن ماشوم ته په زور په نکاح کړي چې د محتسبینو له لوري د دغې اجباري نکاح مخه ونیول شوه.
هغه دغه راز زیاته کړه: د امیر المؤمنین حفظه الله له لوري د مېرمنو د حقونو د ورکړې او خوندیتوب په موخه د توشیح شوي قانون له مخې ژمن دي، چې د مېرمنو ټولو شرعي حقونو ته رسېدنه وکړي او هیڅ چاته به اجازه ور نه کړي چې د پښتونولۍ د بې معنی غیرتونو او غیر شرعي کړنو پر اساس د مېرمنو حقونه تر پښو لاندې کړي.
دا په داسې حال کې ده، چې د امربالمعروف، نهې عن المنکر او شکایتونو اورېدلو وزارت محتسبینو د هېواد په ټولو ولایتونو کې د عامه ذهنیت د سمون، معروفاتو اقامې، منکراتو مخنیوي او د مېرمنو د نورو حقونو لکه میراث او مهر ورکړې تر څنګ د نوي کال له پیل سره سل ګونه مېرمنې له اجباري ودونې څخه ژغورلې دي.
