کونړ کې محتسبینو د(۶۰۰) ډالرو او (۲۴۰۰۰۰) زره افغانیو په بدل کې د غیر شرعي نکاح مخنیوی وکړ
د کونړ ولايت د امر بالمعروف مسؤلینو د مېرمنو حقونو ته په ژمنیتا او د مېرمنو پر وړاندې د دتاوتریخوالي ډکو پېښو د مخنیوي په موخه په نورګل ولسوالۍ کې د هغې اتلس کلنې نجلۍ د غیر شرعي نکاح مخه ونیوله چې پلار یې غوښتل شپېته کلن کس ته یې د (۶۰۰) ډالرو او (۲۴۰۰۰۰) زره افغانیو په بدل کې د هغې له خوښې پرته په نکاح ورکړي.
په دې تړاو د یاد ولایت د امر بالمعروف مسؤلینو وویل: د یادې اتلس کلنې نجلۍ پلار، چې غوښتل یې خپله ځوانه لور د زیاتو پیسو په بدل کې د هغې له خوښې پرته په ننګرهار ولایت کې یوه (۶۰) کلن کس ته په غیر شرعي نکاح ورکړي چې د دې ولایت محتسبینو یې مخنیوی وکړ.
محتسبین زیاتوي، هیڅوک نه شي کولای ازاد انسان په پیسو واخلي او یا یې خرڅ کړي، د اسلامي امارت مسؤلین تل په دې لټه کې دي چې خلکو ته د ارام ژوند کولو زمینه برابره کړي.
دا په داسې حال کې ده، چې د امر بالمعروف، نهی عن المنکر او شکایتونو اورېدلو وزارت محتسبینو د هېواد په ډېری ولایتونو کې د مېرمنو د حقونو اړوند نا خوښه ودونې، کورني بند خونو، کورني تاوتریخوالي، ولور او میراث زرګونه قضیې حل کړې دي او په دې پار یې کړنې لا هم دوام لري.
