کابل؛ محتسبینو هغه کوډګر نیولی چې د سحر او جادو ترڅنګ یې د تیلیفون له لارې نجونې بلک مېل کولې
د امربالمعروف، نهی عن المنکر او شکایتونو اورېدلو وزارت اړوند د پلازمېنې کابل پنځمې امنیتي حوزې محتسبینو هغه کوډګر نیولی، چې د ټلیفون له لارې یې نجونې بلک مېل کولې او د کورنیو ستونزو د حل په پلمه یې له هغوی څخه ناوړه استفاده کوله.
په تړاو یې د یادې امنیتي حوزې د امربالمعروف مسؤولینو وویل: یاد کس چې له تېرو څو کلونو راهیسې یې د کوډو او جادو ناوړه کړنې تر سره کولې او د تلیفون له لارې یې نجونې بلک مېل کولې او له هغوی څخه یې ناوړه استفاده کوله، د محتسبینو له لوري نیول شوی، چې د لا نورو څېړنو په موخه به عدلي او قضایي ارګانونو ته ور وپېژندل شي.
محتسبین زیاتوي، چې له نوموړي سره یې د نجونو عکسونه، ویډیوګانې، غیر شرعي دمونه او تعویذونه هم نیولي چې د هغوی په توسط یې له نجونو څخه پیسې اخیستلې او له هغوی څخه یې ناوړه استفاده کوله.
د یادولو وړ ده، چې څو ورځې وړاندې هم محتسبینو د پلازمېنې کابل اتلسمې ناحیې سیمه کې یو کوډګر د کوډو او جادو له وسایلو سره یو ځای نیولی او د نورو معلوماتو په موخه یې عدلي او قضایي ارګانونو ته ورپېژندلی دی.
