ډاکتران باید روښانه او د لوست وړ نسخې ولیکي
د خوست ولایت د امر بالمعروف او نهې عن المنکر د قانون د پلي کېدو کمیټې په خپله اونیزه ناسته کې پرېکړه وکړه چې له دې وروسته به هیڅ ډاکتر ته اجازه نه وي چې رمزي، مبهمې یا نه لوستل کېدونکې نسخې ولیکي.
دا پرېکړه د بېلابېلو امارتي ادارو د مسؤلینو او د عامې روغتیا ریاست د استازو په حضور کې وشوه، او ټینګار وشو چې مبهمې نسخې نه یوازې د ناروغانو د سرګردانۍ لامل ګرځي، بلکې دا کار د درمل پلورونکو لپاره د ناسمو ګټو زمینه هم برابروي.
همداراز، پرېکړه وشوه چې دغه کمیټه به له دې وروسته روغتیايي مرکزونه تر څارنې لاندې وساتي او د هغو کړنو مخه به نیسي چې له قانون او اسلامي اصولو سره اړخ نه لګوي، په ځانګړي ډول د داسې نسخو لیکل چې نه لوستل کېږي.
دغه راز په پای کې د ټاکل شوې کمیټې ټولو غړو وویل چې ډاکتران مکلف دي چې د درملو نسخې په څرګنده، او د قانون له اصولو سره سم ولیکي.
