پکتیا کې محتسبینو دوه تنه خطرناک کوډګر نیولي دي
د پکتیا ولایت د امر بالمعروف ریاست محتسبینو په ټولنه کې د خرافاتو د مخنیوي په موخه، دوه تنه هغه کوډګر نیولي، چې له اوږدې مودې راهیسي د ټولنیز نظم د اخلال، د کورنیو په منځ کې د شدیدو اختلافونو د رامنځته کېدو او دغه راز له عامو خلکو څخه د پیسو اخیستلو په بدل کې یې د سحر او جادو غیر شرعي کړنې تر سره کولې نیول شوي دي.
په دې تړاو د یاد ولایت د محتسبینو امر مولوي روح الله سعید وایي: د ساحوي همکارانو پر مټ یې هغه دوه تنه خطرناک کوډګر نیولي، چې د کورنیو ستونزو د حل په پلمه یې له یو کس څخه ۵۰۰ ډالر او له بل کس څخه ۴۰۰۰ افغانۍ اخیستې وې، چې د کوډګرو له نیول کېدو وروسته پیسې بېرته خپلو مالکینو ته وسپارل شوې او کوډګر به د لا نورو څېړنو په موخه عدلي او قضایي ارګانونو ته ور وپېژندل شي.
بلخوا ځایي اوسېدونکي د محتسبینو شتون د ټولنې اصلاح او سمون له پاره اساسي اړتیا بولي او له هغوی غواړي چې په ټولنه کې د نورو منکراتو د مخنیوي تر څنګ د کوډګرو مخنیوي کې لا ګړندي ګامونه اوچت کړي، څو ټولنه له خرافاتو او شرکي عقایدو پاکه شي.
دا په داسې حال کې ده، چې د امر بالمعروف، نهې عنالمنکر او شکایتونو اورېدلو وزارت له لوري د کوډګرو پر کړنو له بندیز وروسته تر دې مهاله سلګونه کوډګر نیول شوي او د قانون منګولو ته سپارل شوي دي.
