په غزني ولایت کې د امر بالمعروف مسؤلینو(۴) مېرمنې له بېلابېلو ظلمونو څخه ژغورلې دي
د غزني ولایت د امر بالمعروف مسؤلینو د امیر المؤمنین حفظه الله له لوري د مېرمنو د حقونو د ساتنې او د مېرمنو حقونو ته په ژمنیتا د یاد ولایت په ګیرو او ګیلان ولسوالیو کې (۲) مېرمنې چې د کورني تاوتریخوالي او ناوړه دودونو په اساس له خپلو شرعي حقونو څخه بې برخې وې له شرعي حقونو څخه برخمنې کړې.
مسؤلین وایي: نوموړې مېرمنې چې له اوږد مودې راهیسې د ناوړه دودونو پر اساس ځورول کېدلې او حقوق یې تر پښو لاندې شوي و، د امر بالمعروف د مسؤلینو په هڅو وژغورل شوې.
دغه راز د یاد ولایت محتسبینو د یو بل غوره اقدام پر مهال په مرکز او اندړو ولسوالۍ کې دوه مېرمنې له غیر شرعي نکاح ګانو څخه وژغورلې او د یادو مېرمنو د کورنیو له غړو یې وغوښتل چې په راتلونکي کې د داسې ناوړه کړنو له تر سره کولو ډډه وکړي.
د یادولو وړ ده، چې د امر بالمعروف، نهی عن المنکر او شکایتونو اورېدلو وزارت ولایتي مسؤلین په دوامداره توګه له ځایي خلکو سره د مېرمنو د حقونو د ورکړې او په دې تړاو د عامه ذهنیت د سمون په موخه اصلاحي ناستې کوي، چې ور سره په دې برخه کې د پام وړ بدلون راغلی ده.
