هلمند کې دوه مظلومې مېرمنې له اوږدمهاله ظلم او تاوتریخوالي وژغورل شوې
د هلمند ولایت محتسبینو په مرکز لښکرګاه ښار او باباجي ولسوالۍ کې د دوو هغو مېرمنو حقونه خوندي کړي، چې له اوږدې مودې راهیسې د خپلو خاوندانو له ظلم، تاوتریخوالي او حق تلفۍ سره مخ وې.
د هلمند ولایت د امر بالمعروف، نهې عنالمنکر او شکایتونو اورېدلو ریاست محتسبینو د ټولنې اصلاح او د مېرمنو د حقونو د خونديتوب ته په ژمنتیا د یاد ولایت مرکز لښکرګاه ښار شپږمې امنیتي حوزې سیمه کې د هغې مېرمنې ستونزه چې له ۲۲ کلونو راهیسې د خپل خاوند له خوا معلقه پرېښودل شوې وه، حقونه یې نه ورکول کېدل او د ګڼو ناخوالو سره مخ وه، حل کړې ده.
د محتسبینو په وینا د یادې مېرمنې خاوند ته د ښځو د شرعي حقونو په تړاو د بشپړ معلوماتو ورکولو په پایله کې نوموړي خپلې مېرمنې ته د هغوی په شتون کې طلاق ورکړ چې ورسره یاده مېرمن له ظلم خلاصه او له خپلو حقونو څخه برخمنه شوه.
بلخوا د باباجي ولسوالۍ محتسبینو هم په یو ورته اقدام کې یوه مېرمن چې له اوږدې مودې راهیسې د خپل خاوند له فزیکي تاوتریخوالي او بد چلند سره مخ وه، ژغورلې ده او له خاوند څخه یې ژمنه اخیستې څو له دې وروسته له خپلې مېرمنې سره د اسلامي اخلاقو او اصولو سره سم چلند وکړي.
د امر بالمعروف، نهي عن المنکر او شکایتونو اوریدلو وزارت ډاډ ورکوي چې د اسلام مبارک دین په رڼا کې د اسلامي او اخلاقي ارزښتونو ساتنې، د خویندو د حقونو خوندي کولو او ناوړه دودونو مخنیوي ته ژمن دی او یاده چاره کې به له هېڅ راز هڅې په شا نه شي.
