نورستان کې د محتسبینو په هڅو ۳۰ کلنه دښمني حل او د ښکېلو اړخونو تر منځ روغه وشوه
د نورستان ولایت د امر بالمعروف، نهی عن المنکر او شکایتونو اورېدلو ریاست محتسبینو د خپل دیني، اخلاقي او ټولنیز مسئولیت له مخې د دیني عالمانو او قومي مخورو په منځګړیتوب په کنتوا ولسوالۍ کې د دوو قومنو تر منځ د ځمکې پر سر را پورته شوې ۳۰ کلنه دښمني چې د ګڼو ستونزو لامل شوې وه حل او د دواړو لوریو ترمنځ یې روغه وکړه.
دا اوږد مهاله دښمني، چې د یادو قومونو تر منځ د دوامداره شخړو لامل شوې وه د یاد ولایت محتسبینو د سیمې د دیني عالمانو او قومي مخورو په منځګړیتوب حل او پر دوستۍ بدله کړه.
د روغې جوړې په پار جوړې شوې ولسي ناستې ته د یاد ولایت محتسبینو، دیني عالمانو او قومي مخورو د اسلام په مبارک دین کې د یووالي پر ارزښت خبرې وکړې او ویې ویل، چې د اسلام مبارک دین موږ ته له ټولو قومي او ژبني تعصباتو لرې د ورور ولۍ په فضا کې د ژوند کولو امر کړی دی، چې باید پخپلو کې له یو بل سره د وروڼو په څېر چلند وکړو.
د یادولو وړ ده، چې د امربالمعروف، نهې عن المنکر او شکایتونو اورېدلو وزارت ولایتي مسؤلینو تېره جدې میاشت د هېواد په کچه د لسګونه بېلا بېلو لویو او وړو شخړو مخه نیولې او د ښکېلو اړخونو تر منځ یې روغه کړې ده.
