میدان وردګو کې محتسبینو یوه مېرمن له اوږد مهاله کورني تاوتریخوالي وژغورله
د امربالمعروف، نهې عن المنکر او شکایتونو اورېدلو وزارت اړوند د میدان وردګ ولایت محتسبینو د دې وزارت له لوري د مېرمنو د حقونو د ورکړې او ساتنې په موخه، د نوي توشیح شوي قانون له مخې یوه مېرمن، چې له تېرو څو کلنو راهیسې د خاوند او لېورونو له لوري له ظلم، زور زیاتي او جدي کورني تاوتریخوالي سره مخ وه، وژغورله.
په دې تړاو د یاد ولایت محتسبینو وویل: یاده مېرمن، چې د نرخ ولسوالۍ اوسېدونکې ده، له تېرو څو کلونو راهیسې د خسرګنۍ له لوري له جدي کورني تاوتریخوالي سره مخ وه او د کورنیو ستونزو پر اساس د پلار کور ته له تګ څخه منع شوې وه، د محتسبینو له لوري وژغورل شوه او د خسرګنۍ له غړو څخه یې وغوښتل شول، چې په راتلونکي کې د داسې غیر شرعي کړنو له تر سره کولو ډډه وکړي.
ورته مهال د فاریاب ولایت محتسبینو په یو بل ورته اقدام کې یوه مېرمن له دوه کلن کورني تاوتریخوالي وژغورله او یوې بلې مېرمنې ته یې د مهر یا ولور حق وسپاره او د نجلۍ کورنۍ ته یې په سپارښتنو کې وویل: مهر، میراث، په خپله خوښه نکاح کول او پر خاوند باندې د مېرمنې نفقه دا د هغوی شرعي حق دی چې باید ورته وسپارل شي، تر څو په ټولنه کې الهي قوانین پلي او د شته ناوړه دودونو او بدیو مخه ونیول شي.
دا په داسې حال کې ده، چې د امربالمعروف، نهې عن المنکر او شکایتونو اورېدلو وزارت محتسبینو د هېواد په ټولو ولایتونو کې د مېرمنو د حقونو د ساتنې او ورکړې په موخه د نوي توشیح شوي قانون پر اساس مېرمنو ته د میراث، خپلې خوښې نکاح، ولور او نورو برخو کې سلګونه پېښو ته رسېدنه کړې او په دې برخه کې یې د شته ستونزو مخه نیولې ده.
