محتسبین: هېڅ چاته به اجازه ور نکړي چې د مېرمنو حقوق تر پښو لاندې کړي
د میدان وردګ ولایت د سیدآباد ولسوالۍ محتسبینو د سیمې د قومي مخورو په منځګړیتوب د ټولنې اصلاح او د مېرمنو د حقونو خوندیتوب ته په ژمنتیا یوه مظلومه مېرمن له ( ۴ ) کلن فزیکي او رواني تاوتريخوالي وژغورله.
محتسبینو د دې ولایت سیدآباد ولسوالۍ شنیز درې لوړې کې هغه مېرمن، چې د خسرګنۍ د غړو له لوري له تېرو څلورو کلونو راهیسې له فزیکي او رواني تاوتریخوالي سره مخ وه، وژغورله او د خسرګنۍ له غړو څخه یې ژمنه واخیستل شوه، څو د مېرمنو پر وړاندې له تاوتریخوالي ډکو پېښو څخه ډډه وکړي.
محتسبین ډاډ څرګندوي، چې د خویندو د شرعي حقونو خوندیتوب ته ژمن دي او هېڅ چاته به اجازه ور نکړي چې د مېرمنو حقوق تر پښو لاندې کړي.
د یادولو ده، چې د امر بالمعروف، نهی عن المنکر او شکایتونو اورېدلو وزارت محتسبینو د دې وزارت له لوري د مېرمنو د حقونو د خوندیتوب په موخه د جوړ شوي قانون له مخې، د هېواد په کچه د مېرمنو اړوند سلګونه قضیې حل کړې او مېرمنې یې له خپلو شرعي حقونو څخه برخمنې کړې دي.
