محتسبین: لومړنۍ هڅه مو د قومي او ژبني تعصباتو له منځه وړل او د هغوی د حقونو تأمین دی
د امر بالمعروف، نهی عن المنکر او شکایتونو اورېدلو وزارت اړوند د غزني او کونړ ولایتونو محتسبینو د ټولنیز عدالت د تأمین او یووالي په موخه په یادو ولایتونو کې دوه قومي شخړې حل کړې دي.
په یادو ولایتونو کې د محتسبینو له لوري د روغې جوړې په پار په جوړو شویو ناستوکې محتسبینو وویل: د اسلامي امارت او په ځانګړي ډول د امربالمعروف وزارت مسؤلین د قومونو ترمنځ د یووالي او پرمختګ په هڅه کې دي او ژمن دی چې په ټولنه کې د قومي او ژبني تعصباتو په اساس را منځته شوې شخړې له منځه یوسي.
دغه راز محتسبینو له ښکېلو اړخونو د مننې تر څنګ په ولسي خلکو غږ وکړ، چې د ورته ستونزو او نورو منکراتو په حل او مخنیوي کې له مسؤلینو سره مرسته وکړي.
بلخوا ځایي اوسېدونکي د محتسبینو یادې کړنې ستایي او له هغوی غواړي، چې په ټولنه کې د ورته ناخوالو له منځه وړلو لپاره لا پر وخت او ګړندۍ کړنې هڅې وکړي.
