محتسبینو په روزګان، میدان وردګ او فاریاب ولایتونو کې (۳) مېرمنې له کورني تاوتریخوالي وژغورلې.
د امر بالمعروف، نهې عن المنکر او شکایتونو اورېدلو وزارت اړوند د میدان وردګ، روزګان او فاریاب ولایتونو محتسبینو درې مېرمنې، چې له خپلو شرعي حقونو څخه بې برخې او له جدي کورني تاوتریخوالي سره مخ وې وژغورلې او د یادو مېرمنو د کورنیو له غړو یې وغوښتل چې په راتلونکي کې د داسې ناوړه کړنو له تر سره کولو ډډه وکړي.
د محتسبینو په وینا: یادې مېرمنې چې له اوږدې مودې راهیسې د ناوړه دودونو پر اساس زورول کېدلې او له جدي کورني تاوتریخوالي سره مخ وې د محتسبینو له لوري وژغورل شوې او له خپلو شرعي حقونو څخه برخمنې شوې.
د امر بالمعروف، نهې عن المنکر او شکایتونو اورېدلو وزارت محتسبین ډاډ څرګندوي، چې په پوره توان به د مېرمنو له شرعي حقونو څخه دفاع کوي او د هغو بدو پېښو مخه به نیسي چې د مېرمنو شرعي حقوق له ګواښ سره مخ کوي.
د یادولو وړ ده، چې د دې وزارت محتسبینو په تېرو څو میاشتو کې د مېرمنو د نورو حقونو لکه میراث، مهر او خپلې خوښې نکاح تر څنګ لسګونه مېرمنې له کورني تاوتریخوالي او کورنیو بندخونو څخه ژغورلې دي.
