لغمان کې د محتسبینو په هڅو (۲۲) کلنه دښمني حل شوه
د امربالمعروف، نهې عن المنکر او شکایتونو اورېدلو وزارت اړوند د لغمان ولایت محتسبینو د خپل دیني، اخلاقي او ټولنیز مسئولیت له مخې، د سیمې د قومي مخورو په منځګړیتوب د دوو کورنیو تر منځ د حقوقي مسائلو پر سر راپورته شوې(۲۲)کلنه دښمني حل او پر دوستۍ بدله کړه.
د محتسبینو له لوري د قومي مخورو او دیني عالمانو په منځګړیتوب د روغې جوړې په پار جوړې شوې ناستې ته محتسبینو پخپلو خبرو کې وویل: قومي او ژبني دښمنۍ پالل له یوې خوا په هېواد کې راغلی امن ګواښي او له بل پلوه نوی نسل د بدیو دوام ته هڅوي، چې مخنیوی او پر وړاندې مبارزه یې زموږ او ستاسې ګډ مسؤلیت دی.
ورته مهال په دښمنۍ کې ښکېلو اړخونو، دیني عالمانو او قومي مخورو د دې لوی ناورین پر مخنیوي خوښي وښوده او په ټولنه کې د محسبینو له لوري د معروفاتو په اقامې او د منکراتو په مخنیوي کې یې د محتسبینو کړنې وستایلې او ژمنه یې وکړه، چې د ټولنې په معنوي رغښت کې د محتسبینو تر څنګ ولاړ دي.
د یادولو وړ ده، چې د امربالمعروف، نهې عن المنکر او شکایتونو اورېدلو وزارت محتسبینو د روان کال په سنبله میاشت کې د هېواد په کچه د (۳۴) بېلا بېلو لویو او وړو دښمنیو مخه نیولې ده.
