شیخ عزیز الرحمن المهاجر: ولس سره نېک چلند ترسره کړئ، غوښتنې او شکایتونه یې واورئ او پر وخت ورته رسېدنه وکړئ
د هرات ولایت د امر بالمعروف نهې عن المنکر او شکایتونو اورېدلو رئیس شیخ عزیز الرحمن المهاجر د هرات ولایت درې ولسوالیو پشتون زرغون، اوبه او چشت شریف ته رسمي سفر وکړ.
دغه سفر د ولسي ستونزو اورېدو، د محلي ادارو د فعالیتونو ارزونې، د ولس او امارت ترمنځ د اړیکو پیاوړتیا، او د دیني او ټولنیزو چارو په برخه کې د لازمو لارښوونو په موخه ترسره شو.
شیخ المهاجر په پشتون زرغون او اوبه ولسوالیو کې له ملکي او نظامي مسئولینو سره جلا جلا ناستې وکړې او د خلکو شکایتونه او غوښتنې یې له نږدې واورېدې.
همدا راز ښاغلي المهاجر دیاد ولایت د چشت شریف ولسوالۍ له علماوو، قومي مشرانو، متنفذینو او د محلي ادارو له استازو سره وکتل چې په لړ کې یې د یادې ولسوالۍ خلکو خپلې غوښتنې، وړاندیزونه او ستونزې مستقیم له ښاغلي المهاجر سره شریکې کړې.
په ياد سفر کې ښاغلي المهاجر له ټولو مسؤلینو وغوښتل چې له ولس سره نېک چلند ترسره کړئ غوښتنې او شکایتونه یې واورئ او په وخت ورته رسېدنه وکړئ.
د یادولو ده چې تر دې مخکې هم ښاغلي المهاجر د یاد ولایت ټولو ولسوالیو ته سفرونه کړي او د خلکو ستونزو او شکایتونو ته یې له نېږدې رسېدنه کړې.
