د غزني ولایت محتسبین: هیڅ چاته به اجازه ور نکړو، چې د مېرمنو شرعي حقوق تر پښو لاندې کړي
د غزني ولايت د امر بالمعروف ریاست محتسبینو د امیر المؤمنین حفظه الله له لوري د مېرمنو د حقونو د خوندیتوب په موخه د جوړ شوي قانون له مخې د دې ولایت په قره باغ ولسوالۍ کې یوه مېرمن، چې له تېرو دوولسو کلونو راهیسې د خسرګنۍ له لوري ظلم ور سره کېده او له خپلو شرعي حقونو څخه بې برخې وه له خپلو شرعي حقونو څخه برخمنه کړه.
په دې تړاو د یاد ولایت د امر بالمعروف رییس وایي یاده مېرمن چې د جمال خېلو کلي اوسېدونکې ده، چې د خپلې خسرګنۍ له لوري له دوامدار فزیکي ځورونې، سپکاوي او بد چلند سره مخ وه او له ټولو شرعي حقونو څخه بې برخې وه د محتسبینو په هڅو یادې مېرمنې ته خپل شرعي حقوق وسپارل شول.
محتسبینو د نوموړې مېرمنې د خسرګنۍ له غړو سره په اصلاحي ناسته کې د اسلام په مبارک دین کې د مېرمنو پر ارزښت او د هغوی د حقونو په تړاو خبرې وکړې او له هغوی څخه یې ژمنه واخیسته، چې په راتلونکي کې د داسې ناوړه کړنو له تر سره کولو ډډه وکړي.
د یادولو وړ ده، چې د یاد وزارت محتسبینو د هېواد په کچه تېره سرطان میاشت کې د مېرمنو (۱۲۰) بېلا بېلو قضیو ته رسېدنه کړې او ډاډ څرګندوي، چې په پوره توان به د هغو ټولو بدو پېښو مخه نیسي، چې له امله یې د مېرمنو شرعي حقوق له ګواښ سره مخ وي.
