د امر بالمعروف وزیر شیخ محمد خالد الحنفي د بهر مېشته افغان علمي او ټولنیزو شخصیتونو له پنځلس کسیزه پلاوي سره وکتل
د امر بالمعروف، نهې عن المنکر او شکایتونو اورېدلو وزارت سرپرست وزیر شیخ محمد خالد الحنفي په خپل کاري دفتر کې د بهر مېشته افغان علمي او ټولنیزو شخصیتونو له پنځلس کسیزه پلاوي سره لیدنه کې په ګډې همکارۍ او همغږۍ ټینګار وکړ.
د ناستې پیلیزه وینا کې شیخ محمد خالد الحنفي راغلي پلاوي ته ښه راغلاست ووایه او زیاته یې کړه چې د اسلام مبارک دین اساسي موخه د انسان د بندګۍ له زنځیرونو څڅه د بشریت خلاصون دی.
ښاغلي شیخ صاحب همداراز د یاد وزارت په لاسته راوړنو او کړنلارو مفصلې خبرې وکړې او ویې وویل چې په ټولنه کې د خلکو عامه پوهاوي لوړېدا لپاره په لویه کچه هڅې روانې دي او د خلکو سره پراخه همغږي شتون لري.
ښاغلي شیخ صاحب ټینګار وکړ چې د خویندو او عامو وګړو د ټولو شرعي حقونو خوندیتوب په پار د یاد وزارت په هڅو د خلکو لسګونه زره شکایتونو ته رسېدنه شوې، ۲۵ زره خویندو ته میراث ورکړل شوی او د ګڼ شمېر نورو ناوړه دودونو مخنیوی ترسره شوی دی.
شیخ صاحب همداراز روښانه کړه چې افغانستان په تېرو څو لسیزو کې د بېلابېلو هېوادونو فکري او فزیکې جګړې ښکار وو، خو نن مسؤولین د خلکو، دیني علماوو او مشرانو سره په مشوره او همغږۍ د نظام چارې مخته وړي.
ښاغلي شیخ صاحب همداراز له یاد پلاوي وغوښتل څو د خپل دیني مسؤولیت له مخې د اسلامي نظام مثبت انځور او پیغام تر نړیوالو ورسوي او د منفي تبلیغاتو ښکار نه شي.
ورته مهال یاد پلاوي په جوړه شوې ناسته خوښي څرګنده کړه او ویې ویل: موږ د محتسبینو له کړنو خوښ یو او تر اوسه مو هېڅ داسې پېښه نه ده لیدلې چې پکې د محتسبینو له لوري زور، جبر یا غیر اسلامي چلند شوی وي.
هغوی همداراز وویل، تل یې هڅه کړې، څو له هېواد څخه بهر د ناستو او لیدنو له لارې په هېواد کې شته حقایق او مثبت بدلونونه تر نړیوالو او جلا وطنه افغان وکړو ورسوي.
د یاد پلاوي غړو په خپلو خبرو کې وویل چې اسلامي امارت په تېرو څو کلونو کې دا ثابته کړې چې د اسلامي شریعت د پلي کولو ترڅنګ د هېواد ابادۍ، پرمختګ، خپلواکۍ او پر ځان بساینې ته ژمنتیا لري.
هغوی همداراز زیاته کړه چې افغان ولس نور د بهرنیو هېوادونو د سیاسي او نظامي لاسوهنې ستړی دی او ډاډ یې ورکړ چې د افغان ولس او اسلامي امارت د غږ پیاوړتیا او شته حقایقو انعکاس کې به له هېڅ راز هڅې ډډه ونه کړي.
د یادولو ده چې په دې ناسته کې د اسلامي شريعت پر تطبیق، مشروع نړیوال تعامل، د افغان ظرفیتونو څخه د ګټې اخیستنې، د خلکو د شکایتونو اورېدلو، د افغان وکړو د شرعي حقوقو خونديتوب، د ناوړه دودونو مخنیوي او ګډې همکارۍ مفصلې خبرې وشوې.
دا په داسې حال کې ده چې د امر بالمعروف، نهې عنالمنکر او شکایتونو اورېدلو وزارت رهبري له دې وړاندې هم له هېواد څخه بهر مېشتو افغانانو سره لیدنو کې له هغوی سره په ګډې او دوه اړخیزه همکارۍ او همغږۍ ټینګار کړی دی.
