د امر بالمعروف، نهې عنالمنکر او شکایتونو اورېدلو وزارت سرپرست وزیر تخار ولایت ته سفر وکړ
د امر بالمعروف، نهې عنالمنکر او شکایتونو اورېدلو وزارت سرپرست وزیر شیخ محمد خالد الحنفي صاحب د یو رسمي سفر په ترڅ کې تخار ولایت ته ولاړ او هلته یې د امیرالمؤمنین حفظه الله د فرامینو، احکامو او هدایاتو د لا ښه پلي کېدو او عامه پوهاوي په موخه د دغه ولایت له ځایي مسؤولینو، علماء کرامو، خطیب صاحبانو، قومې مخورو او ګذر وکیلانو سره وکتل.
د امر بالمعروف، نهې عنالمنکر او شکایتونو اورېدلو وزارت سرپرست وزیر شیخ محمد خالد الحنفي صاحب په خپلو خبرو کې وویل: د جهاد اصلي موخه د کفارو پر وړاندې یوازې مبارزه نه ده، بلکې د جهاد اصلي موخه د شر او فتنې له منځه وړل او ټول شرعي قوانین پلي کول دي او زیاته یې کړه، مسؤولین د هېوادوالو ستونزو اورېدلو ته ژمن دي چې د هر مظلوم د حق پوښتنه کوي.
همدا راز ښاغلي الحنفي وویل، د اسلامي نظام د مشرتابه اطاعت او پلوي د هر مسلمان وګړي مکلفیت دی، مسؤولین مکلف دي تر څو اسلامي شریعت پلی کړي او وګړي بیا پر دې مکلف دي چې د اسلامي نظام ملاتړ او اطاعت وکړي.
نوموړي همدارنګه زیاته کړه، چې علماء دنده لري ترڅو د منبر او محراب له لارې د حکومت او ټولنې ترمنځ ښې اړیکې را منځته کړي.
هغه مسؤولینو ته په خطاب کې وویل: د شهیدانو ارمانونو او خپلو مسؤولیتونو ته ژمن پاتې شئ او د اوسني اسلامي نظام د دوام او پايښت په موخه هڅې وکړئ او زیاته یې کړه د اسلامي شريعت پلي کول زمونږ سره کرښه ده او په یاده برخه کې د هېچ چا پروا نه کوو.
ورپسې د تخار مرستیال والي ملا خان محمد حقاني د ښاغلي وزیر صاحب ورتګ ګټور وباله او زیاته یې کړه چې د امیرالمؤمنین حفظه الله له لوري صادر شوو فرمانونو، حکمونو او لارښوونو په پلي کولو او تر نورو رسولو کې پوره هڅه کوي.
نوموړي همدارنګه ډاډ ورکړ چې د معروفاتو اقامې او د منکراتو مخنیوي په برخه کې به د محتسبینو سره بشپړه همغږي او همکاري کوي.
ورته مهال ځایي اوسېدونکو او قومي مشرانو د امربالمعروف وزارت کړنو او فعاليتونو څخه د قدرداني ترڅنګ وویل: د اسلامي امارت له حاکمیت وروسته تخاري ولسونه په بشپړ امنیت کې ژوند کوي، اسلامي شریعت پلی او منکرات ختم شوي او ډاډ یې ورکړ چې د اسلامي امارت د یو عسکر په څېر به د اسلامي نظام ملاتړ کوي.
هېره دې نه وي چې ښاغلي شیخ محمد خالد الحنفي صاحب د یوې جلا لېدنې په ترڅ کې د یاد ولایت محتسبینو سره ولیدل او هغوی ته یې د امر بالمعروف نهې عن المنکر پر ارزښت، د محتسبینو د فعالیتونو او چارو د لا ښه مخته وړلو په موخه اړینې سپارښتنې او لارښوونې وکړې.
