د امر بالمعروف، نهی عن المنکر او شکایتونو اورېدلو وزارت په اونۍ کې
د امر بالمعروف، نهی عن المنکر او شکایتونو اورېدو وزارت مسؤلینو د هېواد په کچه د اسلامي ارزښتونو د پالنې، مېرمنو د حقونو خوندیتوب، د قومي او ژبني دښمنیو د حل، ټولنیز عدالت د ټینګښت او د ټولنیز اخلاقي سمون لپاره د ټاکل شوې پالیسي پر اساس کړنې تر سره کړې دې.
د امربالمعروف وزارت د وزیر شیخ محمد خالد الحنفي له لوري د نورستان له دیني عالمانو او قومي مخورو سره لیدنه :
د امر بالمعروف، نهی عن المنکر او شکایتونو اورېدلو وزارت محترم وزیر شیخ الحدیث محمد خالد الحنفي د نورستان ولایت له دیني عالمانو او قومي مخورو سره د هغوی د ستونزو اورېدلو او د حل په موخه تر اړوندو ارګانونو رسولو په موخه ولیدل.
د مېرمنو حقونو ته رسېدنه:
دغه راز محتسبینو په دې اونۍ کې د مېرمنو د حقونو اړوند (۸۴) بېلابېلې قضیې حل کړې دي، چې د یادې شمېرې له مخې (۴۱) د کورني تاوتریخوالي، (۹) د میراث، (۱۰) د غیر شرعي نکاح ګانو،(۸) د ولور، (۵) د نفقې ورکړې، (۵) مېرمنو ته شرعي نکاح زمینه برابره شوه او د (۶) مېرمنو د طلاق قضیې حل شوې دې.
د قومي دښمنیو حل:
محتسبینو په ټولنه کې د قومي او ژبني تعصباتو د مخنیوي او د یووالي روحیې د پياوړې کولو لپاره د هېواد په کچه (۷) دښمنۍ او (۵۶) وړې شخړې حل کړې دي.
د کوډګرو نیول:
د یاد وزارت مسؤلینو په ټولنه کې د ناوړه دودونو د مخنیوي، ټولنیز عدالت د تأمین او د خرافاتو د مخنیوي په موخه (۱۱) تنه کوډګر نیولي او د شرعي پرېکړې په موخه یې، عدلي او قضایي ارګانونو ته ور پېژندلي دي.
له سوداګرو سره ناستې:
ورته مهال محتسبینو په بازارونو کې د سود، احتکار، ترازو کې د کموالي، د تاریخ تېره او بې کیفیته موادو د خرڅلاو د مخنیوي په موخه له سوداګرو او هټۍوالو سره (۱۹۸) اصلاحي ناستې کړې او په زیاته اندازه بې کیفیته او تاریخ تېر توکي یې له منځه وړي دې.
