د امربالمعروف وزارت اړوند د نظامي معینیت مسؤلینو د هېواد مشرقي زون له مسؤلینو سره د همغږۍ په موخه ناستې وکړې
د امربالمعروف، نهي عن المنکر او شکایتونو اورېدلو وزارت د نظامي معینیت اړوند په نظامي برخه کې د معروفاتو اقامې او منکراتو ازالې ریاست مسؤلینو او نظامي محتسبینو د هېواد مشرقي زون څلورو ولایتونو ته د خپل رسمي سفر پر مهال، د دې ولایت د ټولو نظامي ارګانونو له مسؤلینو سره د یاد وزارت له لوري په نظامي برخه کې، د شوو سپارښتنو د پلي کولو، معروفاتو اقامې او منکراتو د مخنیوي په موخه ناستې وکړې.
د وزارت له لوري ټاکل شوي هیئت، چې مشري یې په نظامي برخه کې د ازاله منکراتو رئیس مفتي عبدالحمید حماد پر غاړه لري، د هېواد د مشرقي زون ( جلال اباد، کنړ، لغمان اونورستان) ولایتونو د نظامي ارګانونو له مسؤلینو او منسوبینو سره په دې برخه کې د معروفاتو اقامې، منکراتو مخنیوي، د قانون اورولو، د ګډې همکارۍ، له خلکو سره د غوره چلند کولو او د هغوی ستونزو ته د پر وخت رسېدنې په موخه بېلابېلې ناستې وکړې.
د یادولو وړ ده، چې د امربالمعروف، نهي عن المنکر او شکایتونو اورېدلو وزارت له لوري په نظامي برخه کې د معروفاتو اقامې، منکراتو مخنیوي او د ګډې همکارۍ رامنځته کولو په موخه ټاکل شوی هیئت به د هېواد د ټولو ولایتونو له نظامي مسؤلینو سره د همغږۍ رامنځه کولو، په کارونو کې د مرستې او اصلاح په موخه ناستې وکړي.
