د الجامعة دارالعلوم محمدیة دارالامان د دورة الحدیث د درېیمې دورې د فاضلانو د دستار فضیلت او فراغت غونډه وشوه
د الجامعة دارالعلوم محمدیة دارالامان د دورة الحدیث د درېیمې دورې د سلو تنو فاضلانو د لویې او وړې دورې د دستار فضلیت او فراغت غونډه د ګڼو امارتي مسؤلینو، دیني عالمانو او ځایي خلکو په شتون کې وشوه.
غونډې ته د امر بالمعروف، نهي عن المنکر او شکایتونو اورېدلو وزیر شیخ الحدیث محمد خالد الحنفي صاحب د بخاري شریف د ختم تر څنګ فاضلانو ته په خبرو کې وویل: تاسې ته اوس په ټولنه کې د الهي قوانینو پلي کولو، معروفاتو اقامې، منکراتو مخنیوي او د ټولنې د سمون مسؤولیت در له غاړې شو، لازمه ده چې په پوره توان د ټولنې د سمون لپاره کار وکړئ.
همدارنګه غونډې ته کور او ښار جوړولو وزیر وویل: د الله جل جلاله په وړاندې د نورو بنده ګانو په پرتله د عالم مرتبه لوړه ده او هر چاته چې الله جل جلاله د خیر اراده وکړي؛ علم ور نصیب کړي. د نوموړي په وینا؛ د عالم ذمه واري د نورو خلکو په نسبت ډېره ده، ځکه دیني عالم باید د ټولنې په معنوي او مادي جوړښت کار وکړي او خلکو ته الهي قوانین په هغه ډول ورسوي؛ څرنګه چې یې حق دی.
دغه راز ناستې ته د کابل جهادي مدرسې استاد شیخ الحدیث محمد نعیم حقاني وویل: د الله جل جلاله قوانین پلي کول او د مظلوم مرسته کول د سیاست غوره معنا ده او دا چاره تر بل هر چا علماء ښه کولی شي، چې په وینا یې؛ الله جل جلاله بنده ګان مکلف کړي دي، چې د خپل شرعي آمر اطاعت وکړي، تر هغو پورې چې په آمرانو کې ښکاره کفر نه وي را ښکاره شوی او خلک یې د الله جل جلاله د اوامرو له پلي کولو نه وي را منع کړي.
د یادولو وړ ده، چې د ناستې په پای کې فاضلانو ته د فراغت سندونه ورکړل شول او غونډه د دعایې په ویلو سره پای ته ورسېده.
