ننګرهار کې یوه نجلۍ له جبري نکاح څخه وژغورل شوه

د ننګرهار ولایت محتسبینو د خپلو کړنو پر دوام په ګوشتې ولسوالۍ کې هغه نجلۍ له جبري نکاح څخه وژغورله چې  په ماشومتوب کې د مور له خوا د بدل واده په نیت په کور کې ساتل شوې وه او نیږدې دیارلس کاله بې سرنوشته پاتې وه.

محتسبینو یې په تړاو وویل: یاده نجلۍ چې نیږدې ۱۳ کاله وړاندې، هغه مهال چې لا کوچنۍ ماشومه وه، د خپلې مور له لوري د بدل واده په وعده په کورکېنول شوې وه او بې‌سرنوشته پاتې وه؛ چې د نجلۍ له شکایت وروسته معلومه شوه، چې له یاد هلک سره نکاح نه کوي او له نوموړي سره یې هېڅ شرعي نکاح نه ده شوې د محتسبینو له لوري وژغورل شوه.

محتسبینو د دواړو کورنیو له مسؤلینو سره تر اصلاحي ناستو وروسته نوموړې نجلۍ له اجباري نکاح څخه وژغورله او هغې ته اجازه ورکړل شوه چې د خپل راتلونکي ژوند او نکاح په اړه د خپلې خوښې او اختیار له مخې پرېکړه وکړي.