نظامي معینیت: د نظامي لیکو ساتل او د هغوی هر اړخیزه اصلاح د اسلامي نظام د ساتنې او تحقق اساسي اړخونه دي
د امربالمعروف، نهې عن المنکر او شکایتونو اورېدلو وزارت د نظامي معینیت علمي بورډ غړو د نظامي محتسبینو په ملتیا د ملي دفاع وزارت اړوند د پلازمینې کابل (مرکزي قول اردو دوهمې پلې لواء) له مسؤولینو او کارمندانو سره د وزارت له لوري د شوو سپارښتونو د پلي کولو او په دې برخه کې د همغږۍ په موخه ناسته تر سره کړه.
ناستې ته د علمي بورډ غړو په خپلو خبرو کې وویل: له دې ناستو او لیدنو څخه زموږ هدف په نظامي او ملکي برخه کې د وزارت له لوري د معروفاتو اقامې او د منکراتو مخنیوي په موخه د را کړل شوو سپارښتنو پلي کول دي چې په وینا یې (د نظامي لیکو ساتل او د هغوی هر اړخیزه اصلاح د اسلامي نظام د ساتنې او تحقق اساسي اړخونه دي چې باید وساتل شي او پالنه یې وشي).
دغه راز نوموړو د آمرينو پر اطاعت او د امربالمعروف، نهې عن المنکر پر شرعي حیثیت بحث وکړ او دا یې د مسلمانانو او په ځانګړي ډول د مجاهدینو او مسؤولینو دیني او هېوادنی مسؤولیت یاد کړ.
د یادولو ده چې د امربالمعروف، نهې عن المنکر او شکایتونو اورېدلو وزارت د نظامي معینیت له لوري په نظامي برخه کې د اصلاحاتو راوستلو په موخه ټاکل شوی هیئت په پلازمینه کابل او ولایتونو کې له نظامي مسؤولینو سره ناستې کوي چې ورسره په دې برخه کې د معروفاتو په اقامه کې د پام وړ بدلون راغلی.
