د امر بالمعروف، نهې عن المنکر او شکایتونو اورېدلو وزارت قدرمن وزیر شیخالحدیث الحاج مولوي محمد خالد حنفي، نن په خپل کاري دفتر کې د نورستان ولایت له یو شمېر قومي مخورو مشایخ عظامو او علماء کرامو سره وکتل.
په دې لیدنه کې وزیر صاحب راغلو قومي مخورو مشایخو او علماوو ته ښه راغلاست ووایه او ویې ویل چې قومي مشران مشایخ او علما د ټولنې په اصلاح، د خلکو د ستونزو په حل او د ولس او ادارو ترمنځ د اړیکو په ټینګښت کې مهم رول لري. نوموړي زیاته کړه چې له قومي مخورو او علماوو سره ناستې او د هغوی له لارې د ولسونو د ستونزو او غوښتنو اورېدل د وزارت له مهمو چارو څخه دي.
ورپسې د نورستان ولایت قومي مخورو او علماوو د خپلو ولسونو په استازیتوب د سیمې یو شمېر حقوقي او ټولنیزې ستونزې له وزیر صاحب سره شریکې کړې او د حل په برخه کې یې د وزارت د همکارۍ غوښتنه وکړه.
وزیر صاحب د هغوي د ستونزو له اورېدو وروسته ډاډ ورکړ چې یادې ستونزې به له اړوندو ادارو سره شریکې او د حل په موخه به یې لازم او کوټلي اقدامات ترسره شي. نوموړي همداراز د ولسونو د مشروع غوښتنو د تعقیب او د ستونزو د حل په برخه کې د وزارت د همکارۍ ډاډ ورکړ.
