د امر بالمعروف، نهې عنالمنکر او شکایتونو اورېدلو وزارت سرپرست وزیر د ولایتي سفرونو په دوام فراه ته ولاړ
د امر بالمعروف، نهې عنالمنکر او شکایتونو اورېدلو وزارت سرپرست وزیر شیخ محمد خالد الحنفي صاحب د امر بالمعروف او نهې عنالمنکر قانون لا ښه پلي کېدو، د خلکو د ستونزو اورېدلو، معروفاتو اقامې او د منکراتو مخنیوي او عامه پوهاوي په موخه د خپلو ولایتي سفرونو په دوام فراه ولایت ته ولاړ او هلته یې د یوې غونډې په ترڅ کې له ملکي او نظامي مسؤولینو، دیني عالمانو، قومي مشرانو، ګذر وکیلانو او ګڼ شمېر فراه میشتو وګړو سره وکتل.
د امر بالمعروف بالمعروف، نهې عنالمنکر او شکایتونو اورېدلو وزارت سرپرست وزیر شیخ محمد خالد الحنفي صاحب په خپلو خبرو کې ټینګار وکړ چې اسلامي نظام د امر بالمعروف او نهې عن المنکر پرته نه شي بشپړېدای او زیاته یې کړه چې د افغان ولس د جهاد له اساسي موخو څخه یو د غربي اشغال پای او بل د اسلامي نظام واکمنېدل وو چې د لوی څښتن تعالی په مرسته دواړو موخو ته ورسېدل.
شیخ الحنفي صاحب همدارنګه وویل: اوس کفري نړۍ له هرې پلمې او لارې کار اخلي ترڅو نړۍ ته د اسلامي نظام په ځانګړې توګه د امر بالمعروف او نهې عنالمنکر وزارت غلط انځور وړاندې کړي او د نړۍوالو ذهنونو کې اندېښنې وزېږوي. هغه همدارنګه پر ټولو ګډون والو غږ وکړ چې د دښمن د منفي تبلیغاتو ښکار نه شي او د اسلامي نظام پایښت او ټينګښت ته کار وکړي.
شیخ صاحب همداراز له مسؤولینو، دیني عالمانو او قومي مشرانو وغوښتل ترڅو د امر بالمعروف او نهې عنالمنکر قانون لا ښه پلي کېدا او د ټولنې په اصلاح کې له محتسبینو سره همکاري وکړي.
ورته مهال د فراه ولایت ځایي مسؤولینو، قومي مشرانو او دیني عالمانو په خپلو ویناوو کې د ښاغلي وزیر صاحب په ورتګ خوښي وښوده او زیاته یې کړه چې د اسلامي نظام ترشا ولاړ دي او هېچا ته به اجازه ورنکړي ترڅو بیا ځلي ټولنه د بدبختیو پر لور بوځي.
هغوی همداراز ډاډ ورکړ چې د امر بالمعروف او نهې عنالمنکر قانون په لا ښه پلي کېدا او په ټولنه کې د منکراتو مخنیوي په برخه کې له محتسبینو سره بشپړه همکاري کوي.
دا په داسې حال کې ده چې د امر بالمعروف، نهې عنالمنکر او شکایتونو اورېدلو وزارت سرپرست وزیر شیخ محمد خالد الحنفي صاحب د اسلامي امارت مشرتابه له لارښوونې سره سم د امر بالمعروف او نهې عنالمنکر قانون لا ښه پلي کېدو او د شکایتونو اورېدلو په موخه د ولایتي سفرونو په ترڅ کې له ځایي چارواکو، قومي مشرانو او دیني عالمانو سره ناستې ترسره کوي.
