د امر بالمعروف، نهې عنالمنکر او شکایتونو اورېدلو وزارت سرپرست وزیر د بدخشان ځایي مسؤولینو سره وکتل
د امر بالمعروف، نهې عنالمنکر او د شکایتونو اورېدلو وزارت سرپرست وزیر شیخ محمد خالد الحنفي صاحب بدخشان ولایت ته د یو رسمي سفر په ترڅ کې د امیرالمؤمنین حفظه الله د فرمانونو، حکمونو او لارښوونو د لا ښه پلي کېدو په موخه د یاد ولایت له ځایي مسؤولینو، علماء کرامو، خطیبانو، قومي مخورو او ګذر وکیلانو سره وکتل.
شیخ محمد خالد الحنفي صاحب جوړې شوې غونډې ته وویل: د امر بالمعروف، نهې عن المنکر او د شکایتونو اورېدلو وزارت لپاره د اسلامي امارت مشرتابه له لوري ځانګړی قانون او تګلاره جوړه شوې، چې ټول مسؤولین به د هغې په رڼا کې خپلې چارې مخ ته وړي.
هغه وویل، چې امر بالمعروف وزارت په ټولنه کې د ناوړه دودونو او د هغې بدو پایلو له منځه وړلو ته ژمن دی او هېڅ چا ته به اجازه ورنکړل شي ترڅو د دغه دودونو په ګټې اخيستنې د چا حق ورڅخه واخلي.
همداراز هغه وویل، چې امر بالمعروف او نهې عنالمنکر ترسره کول د ټولو مسؤولیت دی او ټول باید په دې چاره کې برخه واخلي.
ورته مهال سیمه ییزو مسؤولینو د خپلو خبرو په ترڅ کې د ښاغلي حنفي صاحب په ورتګ خوښي وښوده او هیله یې څرګنده کړه چې د نوموړي په ورتګ به یاد ولایت کې خورا مثبت بدلونونه راشي.
هېره دې نه وي چې ښاغلي وزیر صاحب د دغه سفر په ترڅ کې د بدخشان ولایت د امر بالمعروف ریاست محتسبینو سره جلا ناسته وکړه، هغوی ته یې د خپلو فعالیتونو په اړه لازمې لار ښوونې وکړې.
