مولوي شفیع الله هاشمي: راتلونکی نسل مو هغه څه تکراروي چې استادان يې ورښیي
یکشنبه، رمضان ۲۳، ۱۳۴۳
د ننګرهار ولایت د هسکې مینې ولسوالۍ د امر بالمعروف نهي عن المنکر او شکایتونو اورېدلو امریت یو تن محتسب مولوي شفیع الله هاشمي د یادې ولسوالۍ د مرکزي لېسې له استادانو سره ناسته درلوده چې په یاده ناسته کې دلېسې په شاګردانو سربېره د سیمې ډېری علمي اشخاصو هم ګډون درلود.
په ناسته کې هاشمي د یو لړ نورو موضوعاتو تر څنګ پر دې مفصلې خبرې وکړې چې باید شاګردان او استادان ځانونه پر شریعت برابر کړي او له استادانو یې وغوښتل چې د شاګردانو پر ذهن سازۍ کار وکړي او دغه کار ته لومړي توب ورکړي.
ناستې ته نوموړي پخپلو خبرو کې وویل: له هر چا په هغه اندازه طمع او توقوع کېږي چې څومره مسؤلیت ورته متوجه وي ؛ چې په خبره یې تاسې ته دټول اسلامي امت مسؤلیت در له غاړې دی همدا تاسې یاست چې ټولنه یوه صحیح لوري ته رهبري کولی شئ او هم یې د هلاکت کندې ته غوځولی شئ ځکه چې د ټولنې ځوانه طبقه په راتلونکي کې هغه څه تکراروي چې له تاسو یې زده کړي وي .
نوموړي په همدې تړاو زیاته کړه: دلومړني اسلامي پوهنتون او شاګردانو لومړنی استاد حضرت محمد ص وه، هغه صلی الله علیه وسلم خپلو شاګردانو ته داسې پوهه او تربیه ورکړه چې له ده صلی الله علیه وسلم وروسته یې هم بشر د تباهۍ له کندې وژغوره، نو تاسې هم د هغه نبي صلی الله علیه وسلم او هغو صحابه و شاګردان او وارثین یئ چې بشر یې د تباهۍ په کنده کې له لوېدو ژغورلی دی.
نوموړي همدا راز په استادانو غږ وکړ چې د شا ګردانو په ذهن سازۍ کار وکړي او په دې برخه کې تر خپله وسه کوښښ او زیار وباسي چې په خبره یې د یو اسلامي نظام پیرو او دیوې اسلامي خاورې اوسېدونکی باید په اسلامي فکر سمبال وي او سیرت او صورت یې باید پر شریعي او اسلامي طریقه برابر وي.
هغه زیاته کړه: هر وزارت او هره اداره ځانته لومړیتوبونه لري چې د امر بالمعروف وزارت له پاره لومړي توب ځان او ټولنه په اسلامي او شریعي طریقه برابرول دي چې په دې برخه کې د ټولنې پر خلکو ددې شرعي نصوصو جاري کول جبر او محدودیت نه دی.
نوموړي همدا راز پر خلکو غږ وکړ چې د اسلامي امارت مرسته او همکاري وکړي چې خلکو ورته د هر ډول مرستې او همکاري ډاډ ورکړ او هېره دې نه وي چې د یادو زوزنیزو ناستو او لیدنو لړۍ د هیواد په ډېری ساحو کې تر سره شوې او په ځینو ساحو کې لا هم روانه ده.
