شیخ محمد خالد (الحنفي) د اطاق تجارت مسئولبنو سره وکتل
د امر بالمعروف نهی عن المنکر او شکایتونو اوریدلو وزارت سرپرست وزیر شیخ محمد خالد (الحنفي) نن سه شنبه د حوت په نهمه په خپل کاري دفتر کې د اطاق تجارت له مشر یونس مهمند، حاجي نجیب، حاجي احمدشاه حکیمي، سیدمحمدشاه سادات او ورسره مسئولینو سره وکتل.
لومړی یونس مهمند د ټولو په نمایندګي له وخت ورکولو مننه وکړه او زیاته یې کړه چې ټول هيوادوال د امر بالمعروف نهی عن المنکر او شکایتونو اوریدلو وزارت له اوسنیو کړنو څخه راضي دي او غواړو د تجارت برخه مو له شریعت سره سمه پر مخ ولاړه شي.
وروسته حاجي احمدشاه حکیمي و ویل مونږ اوس او پخوا خدای سره کړي تعهد ته ژمن و او یو، تیر کې له مشکلاتو سره مخ و، مونږ سیاست او جګړه دواړه تجربه کړه، نور باید د هیواد د جوړولو کوشش وکړو، اوسني نظام سره خلک همغږي او همکار دي، هڅه باید وکړو چې افغانستان څه ډول له مشکلاتو وباسو.
د امر بالمعروف نهی عن المنکر او شکایتونو اوریدلو وزارت سرپرست وزیر د هغوی د خبرو په جواب کې و ویل: تاسو هغه څوک یاست چې د هیواد لپاره د یوې کومکي پایې او ستنې حیثیت لرئ، مونږ درته احترام لرو، تاسو سره همکار نه بلکې ستاسو خادمان یو او هر ډول خدمت مو تر خپل وس او توان کوو.
نوموړي زیاته کړه چې دلته هیڅ څوک باید په بل فوقیت ونلري، ټول باید یو بل سره لاس ورکړو، مونږ دا نه غواړو چې زمونږ ولس زمونږ په لاس دردمند شي، تاسو ته چې کوم حرمت خدای جل جلاله درکړی، مونږ په هغه عزت درته قائل یو، لله الحمد مکافات، مجازات، تعقیب او پوښتنه شته، خلک دین ته باید ترغیب شي نه متنفره.
شیخ محمد خالد (الحنفي) په پای کې هغوی ته د هر راز همکارۍ ډاډ ورکړ او ترې و یې غوښتل چې تجار د خدای دوست دی خو تر هغه چې په هغه توګه تجارت کوي چې اللهﷻ یې ترې غواړي.
