زابل کې محتسبینو د تاریخ تېر توکو پټنځایونه کشف او له منځه یو وړل
د زابل ولایت د امر بالمعروف، نهی عن المنکر او شکایتونو اورېدلو ریاست له لوري په بازارونو کې د تاریخ تېر او بې کیفیته موادو د مخنیوي په موخه جوړې شوې کمېټې د دوامدارو څارنو پر مهال، په مرکز قلات ښار کې تر دوه ټنه زیات تاریخ تېر خوراکي او غیر خوراکي توکي هدر کړل.
په تړاو یې محتسبین وایي، چې د خپلو څارنو پر مهال یې د تاریخ تېر خوراکي او غیر خوراکي توکو پټنځایونه کشف کړي، چې مسؤلینو یې په غیر شرعي توګه تار یخ تېر توکي د سیمې پر هټۍوالو پلورل، چې دا چاره د خلکو د روغتیا او عامه سلامتۍ لپاره جدي ګواښ بلل کېږي.
د کمېټې د غړو له لوري یاد پټنځایونه تثبیت، تر تاریختېر توکي راټول او د نافذه اصولو سره سم له منځه یوړل شول او مسؤل شخص د خپل سرغړونکي عمل له امله قانوني تعهد ته اړ کړای شو او د ورته کړنو د نه تکرار په اړه ترې لازم تضمین واخیستل شو.
د یادونې وړ ده، چې د امر بالمعروف، نهی عن المنکر او شکایتونو اورېدلو وزارت مسؤلین د خلکو د روغتیا ساتنې، د احتکار او فساد د مخنیوي، د اسلامي او انساني ارزښتونو د تأمین په موخه، خپلې کړنې لا پیاوړې کړي او د هر ډول ناقانونه کړنو پر وړاندې به له هېڅ ډول شرعي اقدام څخه ډډه ونه کړي.
