بغلان کې د امربالمعروف د مسؤلینو په منځګړیتوب څو کلنه حقوقي دعوه حل شوه
دوشنبه، رمضان ۲۴، ۱۴۴۳
د بغلان ولایت په برکي ولسوالۍ کې د دوو کسانو ترمنځ د ځمکې پر سر څو کلنه دعوه د همدې ولسوالۍ د امرالمعروف، نهي عن المنکر او شکایتونو اورېدلو امریت په منګړیتوب حل او پای ته ورسېده.
د محمد امان ولد میاخان او پیرمحمد ولد میر محمد ترمنځ د ځمکې پر سر دا دعوه له ډېرې اوږدې مودې راهیسې د لانجې له امله همداسې پاتې وه، خو له دعوه کوونکو څخه يې یوه يې د برکي ولسوالۍ د امرالمعروف، نهي عن المنکر او شکایتونو اورېدلو امریت سره شریکه کړه.
د يادې ولسوالۍ د امربالمعروف امر د دواړو لوریو د خبرو له اورېدو وروسته دا دعوه د علماوو او قومي مخورو په واسطه د اسلامي شریعت په رڼا کې حل کړه.
یاده دې وي چې د دعوې دواړو اړخونو د برکي ولسوالۍ د امربالمعروف امریت له نوښت مننه وکړه او د دوی له پرېکړې يې خوښي څرګنده کړه.
