غزني کې یوه نجلۍ له ۷ کلنې نادرکۍ وروسته له خپلې کورنۍ سره یو ځای شوه
د غزني ولایت د امر بالمعروف، نهی عن المنکر او شکایتونو اورېدلو ریاست محتسبینو د خپلو کړنو پر مهال د مرکز اړوند درېیمې حوزې په ساحه کې یوه نجلۍ، چې د خسرګنۍ له لوري د کورني تاوتریخوالي او ناعادلانه چلند له امله له سختو ستونزو سره مخ وه او له خپل کور څخه شړل شوې وه له اووه کلونو وروسته پیدا او بېرته خپلې کورنۍ ته وسپارل شوه.
د یاد ولایت د امر بالمعروف مسؤلین وایي: یاده نجلي چې د خپل پلار له لوري په کم عمر کې واده شوې وه او د خسر په کور کې له زیاتو جنجالونو او تاوتریخوالي وروسته له کوره شړل شوې وه، چې د یاد ولایت د محتسبینو په هڅو پیدا او بېرته خپلې کورنۍ ته وسپارل شوه.
د امر بالمعروف، نهی عن المنکر او شکایتونو اورېدلو وزارت مسؤلین زیاتوي، چې په پوره توان د مېرمنو د ټولو شرعي حقونو تأمین او ورکړې ته ژمن دې او هېڅ چاته به اجازه ور نکړي، چې د مېرمنو پر وړاندې له تاوتریخوالي ډک چلند څخه کار واخلي.
